Жанкелдин ауданында орталық көшелерді қардан тазалау жұмыстары қарқынды

Көше қарлары уақытылы тазартылып жатыр

Биыл қыс мезгілі жайлы. Екі күннің бірінде ауа температурасы төмендеп тұр. Ақ түтек боран әзірге бәлендей қатты емес. Өткен жетіде бір күн ұйытқып боран соғып, Торғай ауылы ішіндегі көшелерді қар басып, техникалардың жүруіне кедергі жасады. Толассыз жауған қар желдің күшімен боранға ұласты. Торғай ауылы ішіндегі жолды тазалу үшін конкурс жарияланып, жергілікті жеке кәсіпкер Нұржан Ғаниматов мердігер атанды. Қысқы қарды тазалау жұмыстарына аудандық бюджеттен 2 млн теңге қаржы бөлінген.

«Жыл сайынғы үрдіс бойынша ауыл ішіндегі жолдарды қардан тазалау мәселесін қолға алдық. Жақында мердігер анықталды. Күні кеше көшелерді қардан тазалады. 40 көшені бір күннің ішінде тазалап тастау мүмкін емес. Сондықтан тұрғындар түсіністікпен қараған жөн. Жалғыз техникамен көшелерді тазалап үлгірмей жатады. Жеке кәсіпкер Нұржан Төлендіұлы боран басылған соң түстен кейін көшелерді тазалауға кірісті. Түнгі сағат 02:00 ге дейін жұмыс істеді. Ақ түтек боран басылғаннан кейін міндетті түрде тазалау жұмыстарын жүргізіп отырамыз. Оның сыртында жаяу жүргіншілер жолы бар. Оны техникамен тазалай алмаймыз. Барлық көшедегі жаяу жүргіншілер жолын жұмыссыздықтың адамдары қолдарына күрек алып тазалап жүр. Сондай – ақ, орталықтағы саябақтарды қардан тазалау осы адамдардың құзырында. Қарапайым халық ниет білдіріп, өз еріктерімен «Асар» жасап, қар тазалау жұмыстарына бір сәтке шықса, еш артықшылығы болмас еді. Орталық көшелерді қардан тазалау жұмыстарын назарда ұстайтын боламыз», – дейді Торғай ауылының әкімі Кемеңгер Қарағұлұлы.

Байбатыр НИЯЗБЕКҰЛЫ
Суретті түсірген: автор