Qostanai.Media – ГЛАВНЫЙ ПОРТАЛ

Өңіріміздің Жангелдин, Жітіқара, Б.Майлин аудандарына 45 тонна шөп жөнелтілді

Үстіміздегі жылғы жауын-шашынның дер кезінде болмауынан орын алған қуаңшылық мал өсіріп отырған кейбір аудандардағы ағайындарға оңай соққан жоқ. Осы азаматтық пен іскерлік сыналар шақта «Қиындықта ел бірге» жобасының аясында Қостанай өңіріндегі жанашыр азаматтар да оған өздерінің лайықты үлесін қосты.

Мысалы, облыстағы қолдауға зәру 4 ауданға, көмек беру үшін қыруар жұмыстар атқарылды. Осындай ұйымшылдықтың және ауыз бірліктің нәтижесінде Жангелдин, Жітіқара және Б. Майлин аудандарына 45 тонна 400 келі мал азығы болып табылатын шөп жөнелтілді.

Аталмыш игі шараға 1 млн 351 мың теңге жұмсалып, қостанайлықтар да қиын кезде жерлестеріне көмек беруге әрқашан дайын екендіктерін көрсетті. Оған облыстық мешіттің жанындағы «Зекет» қайырымдылық қоры ұйытқы болды.

– Қиындықта бір-біріне қол ұшын беру ағайынның парызы болса керек. Облысымыздағы 4 аудан мал азығынан қиыншылық көріп отыр дегенді естіп, мешіттегі қайырымдылық қор қала тұрғындарының көмегімен қажетті қаражат жинаған болатын. Міне, осы қаражатқа төрт түлікпен күн көріп отарған жандарға дер кезінде көмек қолын созып отырмыз. Қайырымдылық – қайырымы мол іс екені белгілі. Осы шараға белсене атсалысқан жандарға Алла мол сауабтан жазсын, – дейді облыстық мешіттің аппарат басшысы Қанат Орынтай.

Қиналғанға көмек көрсету имандылықтың белгісі. Бірлігі жарасқан елдің болашағы жарқын болары хақ.

Аягөз КӘКІМЖАНОВА