Тәуелсіздік күні қарсаңында Арқалықта жаңа балабақша есігін айқара ашты

 Тәуелсіздік күні қарсаңында Арқалық қаласында 148 балаға шақталған жаңа балабақша ашылды.

Мектепке дейінгі тәрбие ұйымының қуанышын бөлісуге Арқалық қалалық мәслихаттың төрағасы Гүлбану Елтебаева келді. Балалар мекенінің ашылуымен құттықтап, бұл игілікті істің болашаққа нық қадам басатын, саналы, отансүйгіш азамат тәрбиелеу бағытында жасалып жатқан оң істердің бірі екенін ерекше атап өтті.

Жаңа бөбекжайдың тұсаукесер рәсімі Арқалық қалалық аналар кеңесінің төрағасы Бақытжамал Қалтаева мен балабақша балақайларының әжесі, зейнеткер Клара Жанұзаққызына бұйырды. Ұлттық салт-дәстүрімізге сай шашу шашылып, бата берілді. Қала тұрғындарына балабақшаның ашылғанына қуанышты.

-Немерелерімді бабалбақшаға өзім әкеліп, алып кететініме қуанып отырмын. Мұнда дұрыс тәрбие, сапалы білім беретініне сенімім зор. Осы орайда алдағы Тәуелсіздік күнімен құттықтағым келеді. Балаларымыз аман болсын, – дейді қала тұрғыны, зейнеткер Клара Жанұзаққызы.
Мектепке дейінгі білім беру мекемесі «Ақбота» бөбекжайының екінші ғимараты жанынан ашылып отыр. Балабақша толықтай жабдықталып, білікті мамандар еңбек етпек. Қазіргі таңда Арқалық қаласында балабақша кезегінде 633 бала тұр.

Ел Президенті Қасым-Жомарт Тоқаев халыққа Жолдауында 2025 жылға дейін алты жасқа дейінгі балалар мектепке дейін тәрбиелеу және оқытумен 100% қамтамасыз ету қажеттігін айтқан болатын. Бұл мәселені шешу үшін алдағы жылы қаламызда жаңа балабақша бой көтереді деген жоспар бар»,-дейді қалалық мәслихат төрағасы Гүлбану Төкенқызы құттықтау сөзінде.

Суреттерді түсірген – Мұрат ЖҮНІСҰЛЫ