Мектепке әзірлік басталды

 Қамысты ауданында «Мектепке жол» акциясы бастау алды.

Қазір мектепке дайындық қызған шақ. Аудан орталығында тұратын көп балалы отбасы — Уәлихан Нұрпейісовтың жанұясы. Қазір мектеп формасынан бастап, бастан-аяқ бір баланы киіндіруге қыруар қаржы кететінін айтады.

-Біз 4 бала тәрбиелеп отырған көпбалалы отбасымыз. Өзім тұрақты жұмыста жоқпын. Көтерме жұмыс кездескен жағдайда жұмыс жасаймын. Аружан, Назым есімді қыздарым Алматыда ЖОО-да оқитын студенттер. Жарқын 3 сыныпқа, Айдана 1 сыныпқа барады. Студенттерге кететін қаржыны айтпағанда мектепте оқитын бір баланың өзіне қыруар ақша кетеді. Атап айтсақ: блузка-7000_10000, пиджак-10000, сарафан-7000, юбка- 8000, туфли-10000-15000, бантик-1-2 мың; ал оқу-құралдары: оқулықтары 10000-15000, дәптер, қалам, қарындаш, пенал, қайшы, фломастер, альбом, күнделік, түрлі түсті қағаз, түрлі түсті қарындаш, өшіргіш, ұштағыш, акварель, т. б қажет заттарға 30000, рюкзак-8000-10000 теңге кетеді. Осыны есептеп қарасақ, 2 студент, 2 оқушыға отбасымыздың қаражаты жетіспейді.

Осы жайымызды ескеріп,«Мектепке жол» акциясымен республикадан оқушыларға деп бөлініп жатқан қаржыдан менің балаларыма да үлес беріле екен, – дейді көп баланың әкесі Уәлихан Нұрпейісов.

Ауданның білім беру саласында 12 жалпы білім беретін мектеп бар. Оның ішінде 8 орта және төртеуі негізгі. Жалпы білім алушылар саны — 1403 адам. «Мектепке жол» акциясы жылда ұйымдасқан түрде өтеді.

Биыл жаңа оқу жылына дайындық ерте бастан басталды. Биыл екі мектепте 7,2 млн теңге сомасында жылу жабдығы ауыстырылды. Сондай-ақ, 50,3 млн теңге сомасына 8 нысанға ағымдағы жөндеу жүргізілді. Білім беру мекемесінің материалдық-техникалық базасын 21,1 млн теңге сомасына нығайту жүргізілді. «Ауыл — ел бесігі» жобасы аясында өткен жылы Қарабатыр жалпы білім беретін мектебіне жалпы сомасы 453,6 млн теңгеге екіжылдық күрделі жөндеу жобасын іске асырылуда. Қазіргі таңда жөндеу жұмыстары 65 % аяқталды. Қыркүйек айына дейін тапсырылу жоспарланған.

Шұға Қоңқабай