Qostanai.Media – ГЛАВНЫЙ ПОРТАЛ

Онда өңірге белгілі азаматтар жастармен жүздесті

Соңғы біраз жылдардан бері яғни 2013 жылдан бері елімізде отбасы күні аталып келеді. Соған орай Л.Н.Толстой атындағы облыстық ғылыми-әмбебап кітапханасының қызметкерлері де тәлімді жүздесу өткізуді  дәстүрге айналдырды.

Міне, осындай берері мол тағылымды кездесу жуырда осы кітапхананың қонақжай  залында ұйымдастырылды. Оны осы парасат ордасының қызметкерлері жоғары деңгейде өткізді.

Оған есімдері елімізге белгілі руханият саласының мамандары қатысты. Солардың бірі – Қазақстан Жазушылар Одағының мүшесі, Қостанай қаласының құрметті азаматы, танымал журналист-жазушы Оразалы Жақсанов.

Сондай-ақ осы басқосуға дін саласында аянбай еңбектеніп келе жатқан дінтанушы, Қостанай қалалық мешітінің наиб имамы Дүйсен Дайыр және белгілі айтыскер ақын Салтанат Өтелбаева арнайы шақырылды.

Осы жиында құрметті қонақтар „Отбасылық құндылықты сақтайық„ деген тақырыпта әңгіме өрбітті. Мәселен, қаламгер Оразалы Отынбайұлы жалпы, адам өмірінде отбасының алатын орнына тоқталса, дін қайраткері Дүйсен Дайыр әрбір шаңырақтың сыйластығы, бірлік-берекесі жайлы сыр шертті.

Көп жылдардан бері руханият саласында жемісті қызмет атқарып келе жатқан ақын қызымыз Салтанат Өтелбаева отбасындағы татулық, бала тәрбиесі жөнінде жан-жақты әңгімелеп берді.

Сондай-ақ бұл басқосуда Елубай Өмірзақов атындағы облыстық филармонияның әншісі Нұржан Жақсан мен болашағынан үлкен үміт күттіретін дарынды жігіт Нұрсұлтан Қасым жиналғандарға өнер көрсетті.

Жиынға Қостанай гуманитарлық колледжінің студенттері қатысып, отбасының құндылықтары жайлы көп мағлұмат алды.

Аягөз КӘКІМЖАНОВА