Қамысты ауданының шалғай елді мекендері ауа райының қолайсыздығын қалай еңсеріп жатыр?

Бораннан кейін алыс ауылдардың қары тазаланып жатыр. Арқа, Талдыкөл, Фрунзе селоларының кіреберісін қардан аршуға техника шықты.

Сейсенбі күні боранның беті қайтты. Былтырғыдан қарағанда қар қалың. Биыл тазалық жұмыстары бойынша бірнеше мердігер мемлекеттік тапсырысты ұтты. Әр бағыт бойынша арнайы техника үлгеру үшін биыл олар тез жол аршуға күш салады. Ауыл ішінің жолдары жергілікті серіктестіктер мойнында.

«Ауылдар бойынша проблема жоқ. Боран салдарынан кейін Фрунзе ауылының жарығы өшті. Бірақ ұзатпай, жедел қосылды. Электр жарығы барлық жерде бар. Боранды күндері жарықтың арасында сөніп қалған кездері болды. Біздің мақсат – электр қуатының үзілісіне жол бермеу, жылу беретін қазандықтарды қалпында сақтау.

Ауылдардың арасындағы жолдарды да қалыпты ұстап тұрамыз. Боран басып тастаса, тиісті жол тазартушы мекемелер барып тазартады. Кейде ауыл арасындағы жолдарды түнде соққан боран жауып, қатынай алмай қалған кездер кездеседі. Бірақ ондай жағдай ұзаққа созылмайды, арнайы мердігерлер тез жол ашуға күш салады», – дейді Қамысты ауданы тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Руслан Юсупов.

«Қазірдің өзінде қар қалың, ауыл-аймақты тегіс қымтады. Бірақ солай екен деп, қыс қаһарына ұшырап қыспақ көріп отырғандар да жоқ. Ауа райының төтенше жағдайларында болмаса, жолдармен көліктер жүріп жатыр. Қамысты ауданның үстімен Ақтөбе жолы өтеді. Сондықтан ауылдарға мұндай қатты боранды, аязды күндері жолға шықпаңыздар деп, ескертіп отырамыз, – дейді төтенше қызмет мамандары.

Қазір қыстың ауыр жағдайын ескеріп, ауданда да, ауылдарда да кезекші қойылған. Электр желілері, жылу қазандықтары бақылауға алынған.

Шұға ҚОҢҚАБАЙ