Жанкелдин ауданында қос әкім халық алдында есеп берді

 Орынды ұсыныстар айтылды

Н.Ахметбеков атындағы мәдениет үйінде аудан әкімі Дінмұханбет Бидашев және Торғай ауылының әкімі Кемеңгер Қарағұлұлы халықпен кездесіп, атқарылған жұмыстарын баяндады. Жиын барысында өзекті мәселелер талқыланды. Атқарылған ауқымды жұмыстарды ауыл әкімі өз баяндамасында толығымен қамтып өтті. Тұрғындар көкейлерінде жүрген сауалдарын жолдап, тұшымды жауап алды. Сонымен қатар, аудан ардагерлері жаңа қызметін бастаған аудан әкіміне жылы лебіздерін білдірді. Алдағы уақытта ауданның алға қарай ілгерілеуі мен халықтың ұсынысына құлақ асатын билік ретінде халықпен бірге тығыз жұмыс жасау керектігін тілге тиек етті.

«Алда атқарылар жұмыс көп. Сіздердің ұсыныс пікірлеріңізді ескере отырып, бірге жақсы жұмыс жасаймыз деген ойдамын. Биыл ауданымызда М.Дулатұлының 140 жылдық мерейтойы Республика көлемде аталып өтілетін болады. Соған орай, облыстың шешімімен жоспарда атқарылу керек көптеген жұмыстар тұр. Одан бөлек тұрғындар болып ауыл тазалығын қолға алып, кәсіпкерлер ғимарат сырттарын қалыпқа келтіру, жаңарту жұмыстарын жүргізу қажет »,-деді аудан басшысы.

Жиын соңында Кемеңгер Қарағұлұлы қоғамдық жұмыста жүрген еңбек адамдарын марапаттады. Жұмыстың қиындығына қарамастан өз маңдай терлерімен, адал нандарын тауып жүрген еңбек адамдары қашанда құрметке лайықты екенін тілге тиек етті.

Аягөз ФАЗЫЛБЕКҚЫЗЫ